Tuesday, June 1, 2010

ಅರಿಕೆ!

ಆಹ್! ಪರೀಕ್ಷೆಗಳು, ಪ್ರಾಜೆಕ್ಟ್ ಕೆಲಸ, ಸೆಮಿನಾರು, ನೋಟ್ಸ್ ಹೊಂದಿಸಿಕೊಳ್ಳೋ ಗಡಿಬಿಡಿಯೊಳಗೆ ಇತ್ತ ಬರಲೇ ಆಗಲಿಲ್ಲ. ನಾಳೆ ಒಂದು ಪರೀಕ್ಷೆ ಇದೆ! ಕೊನೆಯದ್ದು. ಮುಗಿದರೆ ನನ್ನ ಇಂಜಿನಿಯರಿಂಗ್ ಮುಗಿದ್ಹಂಗೆ ಲೆಕ್ಕ! ನೀವೇ ಹೇಳಿ, ಒಂದೇ ಸಲಕ್ಕೆ ಎಷ್ಟು ಅಂತ ಓದೋದಕ್ಕೆ ಆಗತ್ತೆ? ಮಧ್ಯ ಮಧ್ಯ ಏನಾದರೂ ಟೈಮ್ ಪಾಸ್ ಮಾಡ್ಬೇಕಲ್ವೆ? ಕಳೆದ ಪರೀಕ್ಷೆಗೆ ಓದಿ ಓದಿ ತಲೆ ಗಿರಕಿ ಹೊಡ್ಯೋಕೆ ಶುರುವಾದಾಗ, ಕೈಲಿದ್ದ ಪೆನ್ನು ಪೇಪರ್ ತಗಂಡು ಈ ಪದ್ಯ ಗೀಚಿದೆ. ನನಗಂತೂ ಇಷ್ಟ ಆಗ್ಹೋಯ್ತು..ನಿಮ್ಗೆ ಏನನ್ಸುತ್ತೋ ...ಓದಿ ಹೇಳಿ :)

ಎದುರು ಬಂದ ಹೆಣ್ಣಿಗೆ
ಎದೆಯ ಕದ ದೂಡುವ ತವಕವಿಲ್ಲ..
ಬಾಗಿಲು ಬಡಿವ ಸದ್ದು ಕೇಳಿ 
ಹುಚ್ಚೆದ್ದು ಕುಣಿವ ಮನಕೆ ಪುಳಕವಿಲ್ಲ!

ತ್ವರಿತ ಹರಿತ ನಯನ ಶರವು
ನಾಟೆ ಘಾಸಿ ಪುಟ್ಟ ಎದೆಯು
ಚತುರ ಹಸಿತ ಕೇಳಿ ಕರ್ಣ
ಕೇಳದೆನ್ನ ಮಾತೆ ಇನ್ನ..

ಮಲೆಯ ಸೊಬಗ ಕಟಿಯು ಅದುವೆ 
ನದಿಯ ತೆರದಿ ಬಳಸುವಾಸೆ ಎನಗೆ..
ಅಶ್ಮ ವೃಕ್ಷ ಹೊಯ್ಗೆಯೆಲ್ಲ ತೊಯ್ದು
ಕಲಿವೆ ಹರಿತವಂಚ ಮೃದುವಾಗಿಸುವ ಬಗೆ!

ಎಷ್ಟು ದರ್ಪವಿದ್ದರೇನು ...
ಸುತ್ತುತಿಹುದು ಕಿರುಬೆರಳು ಸೆರಗ..
ಕೆರೆಯುತಿಹುದು ಕಾಲ್ಬೆರಳು ನೆಲವ..
ಮನ ನುಡಿಯುತಿಹುದು..
ಆ ನೆಲವೇ ನನ್ನೆದೆಯ ಕದವಾಗಬಾರದೇ?